Нийгэм

Ховд аймгийн Цэцэг суманд тарваган тахал дэгдлээ. 27 настай залууд шинж тэмдгүүд илэрч, шинжилгээгээр батлагдсан байна. Голомттой бүс нутагт хөл хорио тогтоож, хавьтагч нарыг олж илрүүлэн хяналтад авчээ. Тахал хүрсэн анхны иргэний биеийн байдал муудаж, хүндхэн байгааг мэдээллээ.

Энэ сарын 23-нд гэр бүлээрээ амарч явахдаа тарвага агнаж тахлаар өвчилсөн хэрэг гарлаа. Ховд аймгийн Цэцэг сумын иргэн 27 настай эрэгтэй 16 настай дүүтэйгээ тарвага агнаж маргааш өдрөөс эхлэн өвдөж эхэлжээ. Сэжигтэй тохиолдол бүртгэгдсэн даруй сумын эрүүл мэндийн байгууллага хамгийн эхэнд шинж тэмдэг илэрсэн 27 настай эрэгтэйд эмчилгээ хийсэн ч биеийн байдал хүндэрсэн учраас Ховд аймгийн БОЭТ-д яаралтай хүргэсэн байна. Өнөөдрийн байдлаар 27 настай эрэгтэй амьсгалын дутагдалд орсон, биеийн байдал хүнд байгааг албаны хүн мэдээллээ. Харин 16 настай хүүгийн биеийн байдал тогтвортой, булчирхай нь цочсон байгаа юм байна.

Тарваган тахлаар өвчилсөн хүмүүс болон тарваганы мах идсэн иргэдийн нэгдүгээр хавьтагчдыг олж тогтоон хяналтандаа авсан байна. Одоогийн байдлаар тарваган тахлаар өвчилсөн хүмүүсийн нэгдүгээр хавьтагчдыг аймаг сумаас гадагш хөдөлгөөн хийгээгүй гэдгийг ЗӨСҮТ-өөс мэдээллээ.

Ховд аймаг бол тарваган тахлын голомтот бүс нутаг гэж тооцогддог. Амралт зугаалгаар явж байгаа иргэд тарвага агнахгүй байх, махыг нь хүнсэнд хэрэглэхгүй байхыг мэргэжлийн байгууллагаас анхааруулж байна. Мөст, Алтай, Мөнххайрхан сумдад тарваган тахал өвчнөөс урьдчилан сэргийлэх сэрэмжлүүлэг, зөвлөмж мэдээлэл түгээх, Цэцэг суманд шаардлагатай шуурхай арга хэмжээ авч ажиллах зэрэг шийдвэрийг гаргаад байна. Аймгийн хэмжээнд мөн хөл хорио тогтоожээ.