Нийгэм

Коронавируст халдвар олны анхаарал татаж буйн зэрэгцээ тарваган тахал дэгдээд байна. Ховд аймагт тарваган тахлын хоёр тохиолдол бүртгэгдсэн ч нэмж хүн өвчлөлгүй зогсоож чадсан. Одоогоор өвчтөнүүдийн биеийн байдал дунд зэрэг байна. Гэтэл Говь-Алтай аймагт 15 настай хүү тарваган тахлын улмаас амиа алдсан. Иймд үхлийн аюултай тахлаас урьдчилан сэргийлэхийг ЗӨСҮТ-өөс анхаарууллаа.  

Говь-Алтай аймагт гарсан тарваган тахлын улмаас амиа алдсан хүүгийн нэгдүгээр хавьтал болох 15 хүн, 2-р хавьтал болох 8 хүнийг тусгаарлан урьдчилан сэргийлэх эмчилгээ хийж эхэлжээ. Урин дулаан цаг ирж дотоодын аялал жуулчлал эхэлсэнтэй холбоотойгоор сошиал орчинд олон мянган дагагчтай хүмүүс тарвага агнасан зургаа нийтэлж байна. Тарваган тахал дэгдсэн энэ аюултай үед буруу үлгэр дуурайлал үзүүлж байгаа тул Цагдаагийн байгууллагатай хамтран шалгаж зөрчлийн тухай хуулиар шийтгэхийг анхаарууллаа.

АМРАЛТЫН ӨДРҮҮДЭД ЗӨВШӨӨРӨЛГҮЙ ТАРВАГА АГНАСАН, ТЭЭВЭРЛЭСЭН  ДУУДЛАГА БҮРТГЭГДЖЭЭ

Тарвагыг эмчилгээнд хэрэглэдэг гэх ойлголт дэлгэрснээс хойш тарваган тахал сүүлийн жилүүдэд их бүртгэгдэх болжээ. Тодруулбал 2017, 2018, 2019 онд гарсан тарваган тахлын тохиолдлууд бүгд нас барсан болохыг ЗӨСҮТ-өөс мэдээллээ. Коронавируст халдварын нас баралтын түвшин 3 орчим хувь байдаг бол тарваган тахлынх 469 хувь буюу маш аюултай өвчин болохыг анхааруулж байна. 

Тарваган тахал манай улс төдийгүй ОХУ, Казахстан, Өвөр Монголд идэвхтэй байгаа учир мэргэжлийн байгууллагууд хариу арга хэмжээ аван ажиллаж байгааг ЗӨСҮТ-өөс мэдээллээ. Мөн энэ аюулт өвчнөөс урьдчилан сэргийлэхийн тулд иргэдийг тарвага агнахгүй байх, махыг нь хэрэглэхгүй байхыг анхаарууллаа.