Нийгэм

АТҮТ-д бүртгэлтэй 65 компанийн 1200 орчим автобус, такси хот хоорондын үйлчилгээ үзүүлэн ажиллаж байна. Тухайн тээврийн хэрэгслүүдийг 24 цагаар GPS-ийн тусламжтай хянаж аливаа осол, гэмтлээс урьдчилан сэргийлэн ажиллаж байгаа. Гэтэл тээвэрлэлтийн гэрээгүй хувь хүмүүс хот хоорондын тээвэрт явах нь ихэссэн байна. Тиймээс эдгээр иргэдэд зөрчлийн тухай хуулиар хариуцлага хүлээлгэн ажиллаж буйгаа АТҮТ-өөс мэдээллээ.

Амралт, аялал жуулчлалын улирал эхэлсэнтэй холбоотойгоор орон нутгийг зорих хөдөлгөөн ихэссэн байна. Үүнтэй холбоотойгоор хот хоорондын тээврийн үйлчилгээний эрэлт нэмэгджээ. АТҮТ 21 аймаг, 2 суманд байрлах салбаруудаараа дамжуулан хот хоорондын зорчигч тээвэр, ачаа тээвэр, улс хоорондын зорчигч тээврүүддээ аюулгүй байдал, зөрчлийн хяналт тавин ажиллахаас гадна хууль бус тээвэрлэлтэд хяналт тавин ажилладаг байна. 2020 оны хагас жилийн байдлаар тээвэрлэлтийн гэрээгүй нийтийн тээврийн үйлчилгээ эрхэлсэн 258 зөрчил илрүүлжээ.

АТҮТ-д бүртгэлтэй нийтийн тээврийн үйлчилгээ үзүүлдэг автобусууд нь 24 цагийн GPS-ээр хянагддаг болохыг хэлж байна. Одоогоор 68 чиглэлд 910 автобус хот хоорондын үйлчилгээ үзүүлэн ажиллаж байгаа юм.

Нийтийн тээврийн үйлчилгээ эрхлэх зөвшөөрөлгүй иргэд ойрын чиглэлд буюу Дархан, Эрдэнэт, Булган, Архангай зэрэг аймгууд руу хамгийн их явдаг байна. Хууль бус тээвэрлэлт багассанаар эрдэнэт хүний амь нас, эд хөрөнгө хамгаалагдана гэдгийг мэргэжилтэн хэлж байна. Мөн энэ төрлийн зөрчлийг багасгахад иргэдийн оролцоо хамгийн чухал гэдгийг онцоллоо.