Нийгэм

Нийслэлийн автозамын түгжрэл нэмэгдэж хоёр гуравхан км газар хэдэн цагаар зогсож эхэллээ. Хичээл сургууль эхлэхтэй зэрэгцэн жил бүрийн өдийд түгжрэл эрс нэмэгддэг. Эдгээр өдрүүдэд ойролцоогоор 100 мянга гаруй автомашин хөдөлгөөнд нэмэгдэн идэвхтэй оролцдог байна. Түгжрэлийг бууруулах цогц арга одоохондоо байхгүй. Харин замын зохицуулагч нарын тоог нэмэгдүүлж, хөдөлгөөний ачааллыг сааруулах ажлыг хийж эхэлсэн байна.

Хөдөө орон нутгаас Улаанбаатар хот руу чиглэсэн хөдөлгөөний  ачаалал 8,9-р саруудад эрс нэмэгддэг. Ойролцоогоор замын хөдөлгөөнд оролцож байгаа тээврийн хэрэгслийн тоо 100 мянгаар ихэсдэг байна. Гол шалтгаан нь сургууль, цэцэрлэгийн үйл ажиллагаа эхлэхтэй холбоотой учраас Тээврийн цагдаагийн албанаас хичээл эхэллээ нэгдсэн арга хэмжээг зохион байгуулахаар болжээ. Харин жолооч нар зам засварын ажлыг хөдөлгөөний ачаалал бий болохоос өмнө хийж дуусгах, сургуулиудыг автобустай болгох шийдвэрийг гаргах хэрэгтэй гэсэн саналыг хэлж байлаа.

Авто замын ачааллыг нэмэгдүүлж байгаа бас нэг шалтгаан эцэг эхчүүд, хүүхдээ цэцэрлэг, сургуульд нь хүргэж өгөхдөө автомашинаа буруу газар байрлуулж, зохиомол түгжрэл үүсгэдэгээс болдог гэдгийг ТЦА-наас мэдэгдсэн. Иймд сургуулийн үйл ажиллагаа эхлэхээс өмнө энэ асуудлыг төлөвлөж, хөдөлгөөнд соёлтой оролцохыг анхаарууллаа.