Нийгэм

Манай улс циркээ хувьчлаад 13 жил өнгөрч байна. Сумогийн их аварга Дагвадорж менежментийн хувьчлал хийхээр болж дампуурах дөхөөд байсан циркийг буцаан хөл дээр нь босгох даалгавартайгаар гэрээ байгуулжээ. Гэвч циркийн үйл ажиллагаа явагдахаа больж ан амьтад нь үгүйрч, жүжигчид нь майханд бэлтгэл хийх болсныг олон нийт шүүмжилж байгаа юм. Тэгвэл Соёлын яам дэлхийд чансаагаараа 3-т бичигдэж байгаа циркчдээ ядаж бэлтгэл хийлгэдэг болох талаар циркийн удирдлагуудтай зөвшилцөхөөр болсон байна.

Монгол Улсад циркийн урлаг үүсч хөгжөөд 80 жил болжээ. Социализмын үеэс л дээгүүр байранд жагсаж ирсэн циркийн урлаг сүүлийн таван жилийн хугацаанд трукны гүйцэтгэл, акробат, уран нугаралтын төрлөөр дэлхийд үнэлэгдэж байсан. Гэвч одоо акробат, амьтны үзүүлбэрүүд байхгүй болсныг циркчид нүдэндээ нулимстай ярьж менежментийн хувьчлал хийснээс хойш циркийн урлаг хэрхэн нурж байгааг 80 жилийн ойгоороо хэлж байсан. Тэгвэл дэлхийд эхний гуравт жагсах хэмжээний чадвартай Монголын циркчид шороон дээр майханд тоглож байгааг салбарын сайд онцлоод цаашид циркийн хэвийн үйл ажиллагааг хангуулах тал дээр анхаарна гэлээ.

ЦИРКЧИД БЭЛТГЭЛ ХИЙХ БОЛОМЖИЙГ СУДАЛЖ АСА ЦИРКИЙН УДИРДЛАГАТАЙ ЗӨВШИЛЦӨНӨ

2007 онд улсын циркийг их аварга Д.Дагвадорж 1.5 тэрбум төгрөгөөр хувьчилж авсан. Үүнээс хойш 13 жилийн хугацаанд гэрээгээр хүлээсэн үүргээ зөрчиж циркийн хэвийн үйл ажиллагааг алдагдуулсны улмаас Монголын цирк мөхлийн ирмэгт ирлээ гэж мэргэжлийн хүмүүс үзэж байгаа. Менежментийн хувьчлал хийгдсэн тул төр буцаан авах бүрэн боломжтой. Гэхдээ эхний ээлжинд хувьчлал хуулийн хүрээнд явагдсан эсэх, гэрээгээр хүлээсэн үүргээ зөрчсөн үгүйг шалгаж тогтооно гэлээ. Харин энэ сардаа багтаан Аса циркийн удирдлагуудтай зөвшилцөж циркчид бэлтгэл сургуулилт хийх боломж нөхцлийг судлахаар ажиллаж байгааг хэлж байна.
Циркийн сургууль онолын хичээлийг танхимд явуулдаг ч практикийн хичээл хийх зориулалтын заалгүй. Тусгай заал, сургуулилт хийх газаргүй тул Аса цирк дээр түрээсийн журмаар циркийн сургуулийн сурагчид бэлтгэл хийдэг байна. Циркийн байрнаас гадна сургуулийн асуудалд онцгой анхаарахгүй бол 80 жилийн түүхтэй сургууль хоёр жилдээ ганц л удаа элсэлт авдаг болжээ.