Улс төр

Их Британийн хатан хаан 2-р Елизавета улсынхаа парламентын чуулганы нээлтэд оролцож, уламжлалт мэдэгдлээ хийжээ. Хатан хаан улс төрчид болоод ард иргэддээ хандан хийсэн уламжлалт мэдэгдэлдээ Их Британийн Нэгдсэн Вант улс 10-р сарын 31-ний өдөр Брексит хөтөлбөрөө дагаж хэрэгжүүлэх болно гэдгийг мэдэгдэж, ерөнхий сайд Борис Жонсоны засгийн газрын бодлого байр суурийг дэмжиж байгаагаа илэрхийлсэн байна. 

Их Британийн парламентын танхимд хатан хааны хийсэн мэдэгдлийг хүлээн авах эсвэл татгалзан буцаахад хэд хоногийн хугацаа байгаа гэнэ. Их Британийн хатан хааны хийсэн мэдэгдэлд улс орон нь ЕХ-той цоо шинэ түншлэлийн гэрээ байгуулж, шинэ түвшинд харилцаагаа гарган хамтарч ажиллах цаг ирснийг тэмдэглэсэн байна. Энэхүү харилцаа чөлөөт худалдаа, найрсаг хөрш улс орнуудын хамтын ажиллагаан дээр түшиглэх ёстой гэдгийг хатан хаан парламентад хандан хэлсэн үгэндээ онцолжээ.