Улс төр

Туркийн армийнхан Сирийн хойд хэсэгт байрлалаа ахиулан давшилт хийхтэй зэрэгцэн Сирийн засгийн газрын хүчин мөн газар нутгаа хамгаалан Турктэй залгаа хилийн бүс дагуух Манбиж хотод байрлалаа бэхжүүлж байна. Сирийн засгийн газрын хүчин курдын зэвсэгт бүлэглэлтэй тохиролцоо хийсний дагуу Туркийн армийн дайралтын эсрэг хүч хавсран тэмцэж байгаа юм. Тэгвэл Сирийн нутагт өрнөөд байгаа цэргийн ажиллагаатай зэрэгцэн НАТО болон Их Британийн талууд Анкараг Сири дэх ажиллагаагаа зогсоохыг шаарджээ. 

НАТО-ийн ерөнхий нарийн бичгийн дарга Йенс Столтенберг, Их Британийн ерөнхий сайд Борис Жонсонтой хийсэн уулзалт хэлэлцээрийнхээ үеэр Сири дэх нөхцөл байдал тогтворгүйтэж, Туркийн арми цэргийн ажиллагаа явуулж байгаад болгоомжтой хандаж байгаагаа илэрхийлсэн байна. Талууд уулзалтынхаа үеэр Туркийн талын эхлүүлсэн цэргийн ажиллагааг шүүмжлэн буруутгаж, Сири дэх курдын зэвсэгт бүлэглэлийн эсрэг хийж байгаа дайралт бүс нутгийн хямралыг дэвэргээд зогсохгүй мөн исламын улс бүлэглэлийг дахин хүчээ авахад түлхэж болзошгүй гэж үзэж байгаагаа илэрхийлжээ.

Туркийн талыг цэргийн ажиллагаагаа нэн даруй зогсоохыг Анкарагийн хамтрагч улс орнууд ч мөн уриалж байна. Тухайлбал Германы Холбооны канцлер Ангела Меркель Туркийн талыг цэргийн ажиллагаагаа зогсооход уриалж, хэдийгээр Анкара өөрийн газар нутгийн бүрэн бүтэн, аюулгүй байдлыг сахин хамгаалахын төлөө ийм алхам хийж байгааг ойлгож байгаа ч бусдын нутаг дэвсгэр лүү халдаж, энгийн номхон иргэдийг аюулд оруулж байгааг хүлээн зөвшөөрөх аргагүй юм гэжээ.

Анкара энэ сарын 9-нд Сирийн зүүн хойд хэсгийн нутаг руу цэргийн цохилт дайралт хийж, курдын зэвсэгт бүлэглэлүүдийн эсрэг ажиллагаагаа эхлүүлсэн юм. Цэргийн ажиллагаа эхэлснээс хойш 7 хоногийн дотор Сирийн хойд нутгаас 160 мянган иргэн дүрвэн зугтаад байна. Түүнчлэн курдын дайчид Туркийн газар нутаг руу хариу дайралт хийснээс өнгөрсөн хугацаанд 20-иод хүн амиа алдаад байгаа юм. НҮБ-ын хүний эрхийн хороо Турк улсыг дайны гэмт хэрэгт буруутган, хариуцлагад татаж болзошгүй талаар мэдэгдсэн байна.