Улс төр

Пакистанд айлчлал хийж байгаа Их Британийн үе залгамжилсан ханхүү Уильям болон Кембрижийн ахайтан Кейт Мидлтон нар дэлхийн дээвэр гэгддэг Гималайн өндөр уулсын бэл дор байрлах тосгоны иргэдтэй уулзжээ. Тэд айлчлалынхаа 3 дахь өдөр Пакистаны хойд хэсгийн Хайбер-Пахтунхва мужийн Читрал тойрогт хүрэлцэн ирсэн байна.

Кембрижийн гүн болон гүнгийн ахайтан нар Читрал тойрогт байрлах Брохил үндэсний цэцэрлэгт хүрээлэнг зорьжээ. Тэд эндхийн мөнх цастай уулсын дэргэд очиж, уур амьсгалын өөрчлөлтийн улмаас хайлж байгаа мөсөн уулыг харсан байна. Кенсингтоны ордны мэдээлж байгаагаар ханхүү Уильям, Кейт нар айлчлалынхаа үеэр Гималайн уулсын дэргэд очих хөтөлбөр багтаасан нь тэд хүн төрөлхтөний байгаль эх дэлхийтэйгээ буруу харьцаж байгаагаас, мөн аж үйлдвэрлэл өндөр хөгжиж, уур амьсгалын өөрчлөлт эрчимтэй явагдаж байгаагаас мөнх цаст уулс, мөсөн уулууд хайлж байгааг харуулж, анхаарал хандуулахыг хүссэн гэжээ. Тэд Гималайн мөнх цаст уулс хайлж байгааг дэргэдээс нь, өөрийн биеэр харуулж, уур амьсгалын өөрчлөлт, цаг уурын дулаарлын асуудалд дэлхийн улс орнуудын анхаарлыг дахин нэг хандуулахыг зорьсон байна. Кейт, Уильям нар сүүлд нисдэг тэргээр мөсөн уулсыг дээрээс нь танадаж, байгаль хамгаалагчид, мэргэжилтнүүдтэй уулзжээ.