Улс төр

Францад “шар хантаазтан”-уудын тэмцлийн нэг жилийн ойг жагсаал цуглаанаар угтжээ. Францад жилийн өмнө түлш шатахууны татварыг нэмэгдүүлж, үнэ өсөхөд хүргэсэн төр засгийнхаа шийдвэрийг эсэргүүцсэн олон “шар хантааз”-аар жигдрэн эсэргүүцлийн жагсаал өрнүүлсэн юм. “Шар хантаазтангууд”-ын тэмцэл нь Францад батлагдсан “эко-татвар” гэж нэрлэгдсэн түлш шатахууны татварыг нэмсэн шийдвэрийг эсэргүүцэн дэгдсэн олныг хамарсан эсэргүүцлийн жагсаал юм.

Тэгвэл “шар хантаазтан”-уудын жагсаалын нэг жилийн ойг Парис болон бусад томоохон хотуудад мөн л иргэдийн жагсаал цуглаанаар угтжээ. Парис хотын өмнөд хэсэгт байрлах Италийн талбайд хамгийн их хүн оролцсон жагсаал болж, улмаар жагсагчид болон цагдаа хүчнийхний хооронд мөргөлдөөн болсон байна. Хар өнгийн хувцас өмсч, нүүрэндээ маск зүүсэн жагсагчид цагдаа хүчнийхэн рүү мод чулуу нүүлгэж, гудамж талбайд орхисон машин тэргийг галдан шатааж танхайрчээ. Жагсагчид түүнчлэн HSBC банкны шилэн хорго, үүд хаалгыг эвдэж, талбайд хаалт босгосон байна. Цагдаа хүчнийхэн хариуд нь нулимс асгаруулагч хий цацаж, даралттай усаар шүршин, жагсагчдыг тараахыг завдаж байжээ. Энэ үеэр хууль сахиулагчид 60 гаруй хүнийг баривчилсан байна.

Нийтдээ энэ өдөр Парис хотын гудамжинд хэдэн зуун хүн гарч жагсаалд нэгджээ. Анх Францын эрх баригчдын “эко татвар”-ыг эсэргүүцэн дэгдэж байсан жагсаал бүтэн жилийн хугацаанд үргэлжлэхдээ нийгмийг чиглэсэн шинэ шаардлага, шинэ нөхцөл тавин өргөжиж, төр засгийн эсрэг томоохон жагсаал, нэгдэл болон хувирчээ. Францын үйлдвэрчний холбоод ирэх 12-р сарын 5-нд төмөр замынхан, нийтийн тээврийн салбарынханыг, мөн том оврын машин тэрэгний жолооч нар, төрийн албан хаагчдыг тэтгэвэр тэтгэмжийн хуулинд оруулж байгаа өөрчлөлтийг эсэргүүцэн, бүх нийтийн ажил хаялтад нэгдэхэд уриалж байна.