Улс төр

COVID-19 коронавирусанх дэгдсэн эх газрын Хятадад өнөөдрийн байдлаар халдвар авсан хүний тоо 80,422-т хүрч, 2,984 хүн амиа алдан, 50 мянга гаруй хүн эдгэрчээ.

Хятадын эрүүл мэндийн яамнаас мэдээлж байгаагаар COVID-19 энэ улсын 31 мужид бүртгэгдэж, өнөөдрийн байдлаар 27, 433 хүн халдвартай байгаа нь батлагдаад байгаагаас 6,416 хүний биеийн байдал хүнд байгаа юм. 

Сүүлийн нэг хоногт Хятадад COVID-19-ийн 119 тохиолдол шинээр бүртгэгдэж, 2,652 хүн эмнэлгээс гарч, 38 хүн амиа алдсан байна. Эдгээрээс 37 хүн халдварын голомт болох Хубэй мужид амиа алджээ. Түүнчлэн албаны хүмүүсийн мэдээлж байгаагаар халдвараар өвдсөн хүмүүстэй ойр байсан 36 мянган иргэнийг эмнэлгийн хяналтад авч, шинжилгээ авч байгаа юм. Тэгвэл COVID-19 коронавирусын голомт болох Ухань хотод сүүлийн нэг хоногт 115 халдварын тохиолдол бүртгэгдэж, хотын эмнэлгээс 1,859 хүн эдгэрч гарсан байна. 

Эх газрын Хятадаас гадна Хонконгод 100 тохиолдол, Макаод-10, Тайваньд-42 гэхчлэн нийтдээ 151 тохиолдол бүртгэгдээд байгаа талаар мөн мэдээлж байна. Хонконгод 2 хүн амиа алдаж, 37 хүн эдгэрсэн бол Макаод илэрсэн 10 тохиолдлоос 9 нь эдгэрч эмнэлгээс гарсан байна. Түүнчлэн Тайваньд илэрсэн 42 тохиолдлоос нэг хүн амиа алдаж, 12 нь эдгэрэн, бусад нь эмнэлгийн хяналтанд байгаа юм.