Үйл явдал

Английн нийслэл Лондон хотын шүүх WikiLeaks сайтыг үндэслэгч Жулиан Ассанжид холбогдох хэргийн дагуу хэлэлцэж, түүнийг Америкийн талд шилжүүлэх эсэх асуудлаарх шүүх үйл явцыг дахин 3 сарын хугацаагаар хойшлуулах шийдвэр гаргажээ. Ингэснээр Ассанжийн хэргийг 2020 оны 2-р сард шүүхээр дахин оруулахаар тогтсон байна. 

Лондон хотын шүүх байгууллагын өмнө Жулиан Ассанжийг дэмжигчид, хүний эрхийн байгууллагынхан цуглаж, Их Британийн эрх баригчдаас WikiLeaks-ийн үндэслэгчийг Америкийн талд шилжүүлэн өгөхөөс татгалзаж, түүнийг нэн даруй суллан явуулахыг шаардаж байжээ. Ассанж түүний хэрэгтэй холбоотой явагдсан хэд хэдэн шүүх хуралд биечлэн оролцоогүй ч даваа гарагт Лондон хотын шүүх танхимд ирсэн байна. Түүнийг хаалттай машинд суулган шүүх танхимд авчирч, шүүх үйл явц хаалттай хаалганы цаана болжээ.

Хэрвээ Жулиан Ассанжийг Лондоны шүүх Америкийн талд шилжүүлэн өгөх шийдвэр гаргавал түүнд Эрх чөлөөний оронд 175 жилийн хорих ял оноох шийтгэл оногдуулж болзошгүй юм. Учир нь түүнийг Америкийн хуулийн байгууллага WikiLeaks сайтаараа дамжуулан төрийн нууц задруулсан, нууцын зэрэглэлийн цэргийн болоод дипломат баримт бичгийг олон нийтэд ил болгож, Вашингтоны эрх ашгийн эсрэг тагнан мөрдөх ажиллагаа явуулсан хэрэгт буруутгаж байгаа юм.