[File: Kin Cheung/Reuters]

Үйл явдал

Манай урд хөршид хүний уушгинд сөрөг нөлөө үзүүлж, богино хугацаанд тархаж байгаа үл мэдэгдэх вирусын халдвар дэгджээ. Хятадын Ухань хотод энэхүү үл мэдэгдэх вирусын халдвараар 50 гаруй хүн халдварласнаас 7 хүний биеийн байдал хүнд байгаа юм. Түүнчлэн сүүлд ирсэн мэдээллээр үл мэдэгдэх вирусын улмаас нэг хүн амиа алдаад байна.

Үл мэдэгдэх вирус дэгдэж, хоромхон хугацаанд халдварлаж байгаа явдал эмч мэргэжилтнүүдийн санааг зовиноож байна. Одоогоор хүний уушгинд сөргөөр нөлөөлж байгаа энэ вирус чухам ямар төрлийн вирус, хэрхэн халдварладаг, түр хугацааных уу, илүү аюул дагуулах уу зэрэгт тодорхой хариулт өгөх боломжгүй байгаа юм. Хятадын эмч мэргэжилтнүүд учир битүүлэг вирусийн халдвар авсан хүмүүсээс дээж аван, вирусыг лабораторийн нөхцөлд судалж байна. Хятадын эрх баригчид болон ДЭМБ-ын мэргэжилтнүүд халдвар нэгэн төрлийн коронавирусээс гаралтай дэгдэж байгаа гэж үзэж байгаа юм. 2002 онд Хятадад мөн коронавирусын гаралтай халдвар дэгдэж, 8098 хүн халдварласнаас 774 нь амиа алдаж байжээ. Эмч мэргэжилтнүүдийн үзэж байгаагаар коронавирусын халдвар янз бүрийн түвшинд илэрдэг. Зарим тохиолдолд халдвар хүндэрдэг бол зарим тохиолдолд ханиад, томуу төдийгөөр өнгөрдөг нь бий. Тэгвэл Хятадад дэгдээд байгаа шинэ төрлийн вирус нь одоогоор дунд үе шатандаа яваа бололтой. Эмч мэргэжилтнүүдийн вирусын гарал үүсэл, хүндрэл, нөлөө зэргийг судалж байна. Зарим мэдээллээр вирус хүнээс хүнд халдварлаагүй, харин халдвар авсан ихэнх тохиолдол нь хотын загас, далайн гаралтай бүтээгдэхүүн зардаг захаас худалдан авалт хийснээр тохиолдлууд давхцаж байгаа юм. Аюулгүйн үүднээс загасны захыг хаажээ.