Үйл явдал

Манай урд хөршид дэгдээд байгаа үл мэдэгдэх коронавирусын халдварын хүрээ тэлэн, хамгийн сүүлийн мэдээгээр халдвар авсан хүний тоо 200 давж, 3 хүн вирусын халдварын улмаас амиа алдаад байна. Түүнчлэн Хятадын эмч мэргэжилтнүүд үл мэдэгдэх вирус нь агаар дуслаар хүнээс хүнд дамжин халдварлаж байгааг тогтоожээ. 

Хятадад зөвхөн сүүлийн хоёр хоногт л гэхэд вирусын халдварын 139 тохиолдол нэмж бүртгэгдээд байна. Ингэхдээ вирусын дэгдэлт анх бүртгэгдсэн Хятадын төвийн хэсгийн Хубэй мужийн Ухань хотод хамгийн олон тохиолдол бүртгэгджээ.  Түүнчлэн нийслэл Бээжин хотод хоёр, Хонконгтой залгаа Шэньжэнь хотод нэг тохиолдол илэрсэн байна. Хятадын эрх баригчид үл мэдэгдэх коронавирусын халдвар энэ долоо хоногт болох Хятадын уламжлалт шинэ жилийн баяртай холбоотойгоор иргэдийн шилжилт хөдөлгөөн идэвхжсэн учраас богино хугацаанд эрс нэмэгдэж болзошгүй гэж эмээж байна. Сая сая иргэд нь Хятадын Цагаан сарын баяраар эцэг эхийнхээ гэрийг зорьж, дотоодын шилжилт хөдөлгөөн нэмэгдээд байгаа юм. Тэгвэл Хятадын эрүүл мэндийн газар коронавирусын гаралтай шинэ вирус нь хүнээс хүнд дамжин халдварлаж байгааг тогтоосон байна. Үүний баталгаа нь вирусын халдвар авсан хүмүүстэй харьцсан эмнэлгийн 14 ажилтан уг вирусын халдвар туссан байна. 

ДЭМБ энэ сарын 22-нд буюу маргааш Хятадад дэгдсэн шинэ төрлийн вирусын халдварын асуудлаар шуурхай хуралдаан зарлажээ. Хуралдаанаар мэргэжилтнүүд шинэ төрлийн вирусын гарал үүсэл, хор хөнөөл, вирусын халдварын эсрэг тэмцэх арга замын талаар хэлэлцэх юм.