Үйл явдал

Дэлхийн улс орнуудад дэгдсэн шинэ коронавирусын улмаас олон нийтийн арга хэмжээ, хурал зөвлөгөөн цуцлагдаж байна. Испанийн Барселон хотноо зохиогдохоор тов зарлагдсан Mobile World Congress буюу гар утасны компаниудын үзэсгэлэн цуцлагдаж болзошгүй байна. Учир нь олон улсын үзэсгэлэнд технологийн томоохон компаниуд оролцохоос татгалзжээ.

Коронавирусын халдвар дэлхийн улс орнуудад тархаж, тэр дундаа Европ тивд хүрсэн учраас олон улсын үзэсгэлэнд оролцохоос татгалзаж байгаагаа томоохон технологийн компаниуд ар араасаа мэдэгдэж байна. Тухайлбал Intel, Facebook , Vivo, Amazon, Sony, Ericsson, LG, Nvidia,  NTT DoCoMo зэрэг компаниуд Барселоны үзэсгэлэнд оролцохгүй гэдгээ мэдэгдээд байна. Барселон хотноо жил бүр болдог Mobile World Congress олон улсын үзэсгэлэнд дэлхийн томоохон компаниуд оролцдог байна. Олон улсын үзэсгэлэнг үзэж сонирхохоор 100 мянгаад хүн дэлхийн өнцөг булан бүрээс ирдэг байна. Тэгвэл коронавирусын халдварын улмаас олон нийтийн арга хэмжээ зохион байгуулах шаардлага байгаа эсэхэд эргэлзэж, томоохон компаниуд энэ удаад өнжихөөр шийдвэрлэж байгаа юм. Ийнхүү технологийн компаниуд Барселоны олон улсын үзэсгэлэнд ээлж дараалан оролцохоос татгалзсанаас Испанийн сангийн сайд Мария Хесус Монтеро мэдэгдэл хийж, энэ сарын 24-27-ны өдрүүдэд Барселон хотноо болохоор төлөвлөгдсөн үзэсгэлэнгийн аюулгүй байдлыг хамгаалах зорилгоор нэмэлт арга хэмжээ авч байгаа гэж мэдэгдсэн байна.