Үйл явдал

Италид COVID-19 коронавирусын дэгдэлт өндөр байгаа учраас их дээд сургууль, сургууль цэцэрлэгийн үйл ажиллагаанд хориг тавиад байна. 

Италийн засгийн газар боловсролын бүх түвшний байгууллагын үйл ажиллагааг 3-р сарын 15-ныг хүртэл зогсоох шийдвэр гаргажээ. 

Италийн боловсролын яамны сайд Лучия Адзолина энэ талаар мэдэгдэж, улс оронд нь COVID-19 коронавирусын халдвар эрчтэй тархаж, халдварын тохиолдлууд өдрөөс өдөрт нэмэгдэж байгаа учраас боловсролын байгууллагуудын үйл ажиллагааг зогсоох шийдвэр гаргасан гэжээ. Италийн боловсролын яамныхан алсын зайн сургалт явуулах боломжийг судалж, харин бага насны хүүхдүүдтэй эцэг эхчүүд цэцэрлэг, өдөр өнжүүлэх төвүүд ажиллахгүй болсон учраас ажил албаа зохицуулах шаардлагатай болсон байна. 

Италид өнөөдрийн байдлаар COVID-19 коронавирусын халдварын улмаас 100-аад хүн нас барж, 2,500-аад хүнд халдварын шинж тэмдэг илрээд байгаа юм. Итали улс COVID-19 коронавирусын халдварын тоогоороо Европ тивд тэргүүлж, нэг ёсондоо Европ тив дэх голомт болж бүртгэгдээд байна.