Үйл явдал

Манай дэлхийн хамгийн олон хүн амтай Энэтхэг Улсад 30 баг бүрэлдэхүүн коронавирусний эсрэг вакцин гаргах ажлыг явуулж байна. Тэдний ихэнх нь вакцин гарган авах ажилдаа амжилттай явж байгаа тухай мэдээлжээ.

Хүн төрөлхтний түүхэнд хамгийн гэнэтийн төдийгүй асар их хэмжээний аюул дагуулж байгаа ковид-19 цар тахлыг хяналтдаа авч иргэдээ эрүүл байлгахын төлөө дэлхийн олон улс орон хичээн ажиллаж байна. Коронавируст халдварын вакциныг амжилттай гарган авахаас нааш цар тахлын эрч буурахгүй тухай дэлхийн эрдэмтэд сануулсаар байгаа юм. Тиймээс хэд хэдэн улсад коронавирусний эсрэг вакцин гарган авах ажлыг хүчээ дайчлан явуулж байна. Үүний нэг Энэтхэг Улсад 30 шинжээчдийн баг бүрэлдэхүүн вакцин гарган авах ажлыг явуулж байна.

Одоогийн байдлаар тэдний 20 орчим багийн ажил амжилттай үргэлжилж байгаа тухай Энэтхэгийн Засгийн газрын шинжлэх ухааны үндсэн зөвлөх профессор К.Вижай Рагхаван мэдэгджээ. Хамгийн эртдээ энэ жилийн сүүлээр вакцин бэлэн болох төлөвтэй байгааг шинжээчид мэдэгдсэн. Гэхдээ вакцин гарган авах ажиллагаа шат дараалал бүртээ амжилттай байвал энэ үед гарах боломжтой гэдгийг онцлон анхааруулжээ.