Үйл явдал

Хоёр сарын турш өндөржүүлсэн хөл хорио зарласан байсан ОХУ-ын нийслэл Москва хотод хөл хориог цуцалж эхэлсэн. Гуравдугаар сарын сүүлчээр дэлгүүр, жижиг бизнес эрхэлдэг худалдааны цэгүүд хөл хорионы улмаас хаагдсан байсан.

Харин энэ Даваа гарагаас эхлэн машин борлуулах газар, хуурай хими цэвэрлэгээ, гутал засварын газар, номын дэлгүүр зэрэг газрууд эргэн үйл ажиллагаагаа эхэлж байна. Үүнээс гадна энэ сарын нэгнээс эхлэн иргэд амьдарч байгаа дүүрэг хорооныхоо хуваарийн дагуу долоо хоногт гурван удаа гадаа гарах боломжтой боллоо. Өглөөний 5-9 цагийн хооронд иргэд гадаа гарч дасгал хөдөлгөөн хийж болохоор болсон байна.

Дотоодын нислэгүүд ч бас хэвийн үргэлжлэхээр болжээ. Олон улсын нислэгүүд хаалттай хэвээр байгаа.  Өнгөрсөн сарын 27-ны өдөр Москва хотын захирагч Сергей Собянин 6-р сарын 14-нөөс эхлэн зарим хөл хориог багасгах шийдвэрт гарын үсэг зурсан. Энэ ажилтай холбоотой зарим үйл ажиллагааг 6-р сарын 1-нээс эхлүүлэхээр шийдвэрлэсэн байна.

ОХУ-д халдварын шинэ тохиолдол нэмэгдсэн хэвээр байгаа. Өчигдөр гэхэд 9 мянга гаруй шинэ халдварын тохиолдол бүртгэгджээ. Ингэснээр энэ улсад 410 мянга гаруй халдварын тохиолдол батлагдсан байна.