Үйл явдал

Түүхэн баримт сөхвөл одоогоос 75 жилийн өмнө Москва хотын Улаан талбайд Аугаа Эх орны дайны Ялалтын анхны парад болж байсан юм. Ялалтын анхны парадыг 6-р сарын 24-ний чухам энэ өдөр ЗХУ-ын маршал Георгий Жуковоор удирдуулан болж байжээ.

1945 оны 6-р сарын 24-ний өдрийн Москвагийн цагаар өглөөний 10 цагт ЗХУ-ын маршал Георгий Жуков цагаан морь хөлөглөн Улаан талбайн дэргэдэх Спасскийн хаалган дээр гарч ирэн хамгийн анхны Ялалтын парадыг эхлүүлж байсан юм. Маршал Жуковт Ялалтын парадыг командлагч Константин Рокоссовский цэргийн рапорт өгч, Ялалтын сүрт жагсаалд дайчид бэлэн жагссаныг илтгэсний дараагаар Ялалтын баярт зориулсан сүрт жагсаал эхэлж байжээ. Улаан талбайн индэрт ЗХУ-ын удирдагч Иосиф Сталин болон нам төрийн удирдлагууд эгнэн зогсч, парадыг хүлээн авсан юм. 

Аугаа Эх орны дайны Ялалтын сүрт жагсаалын дараагаар маршал Георгий Жуков эгнэн жагссан цэргийн хороодыг морьтойгоо тойрч, Ялалтын баярын мэндчилгээ дэвшүүлэн, фашизмын Германыг нухчин дарсныг илтгэн мэдэгдсэн юм.

Улаан талбайд болсон цэргийн сүрт жагсаалын дараагаар бөмбөрийн нижигнэсэн дуун дор Зөвлөлтийн чөлөөлөгч дайчид мавзолейн бунхны дэргэд фашистын Германы, дайсны туг далбааг шидэж, Эх орны төлөөх дайнд ялгуусан амжилт гаргаж, эх орон, ард түмэн, хөрс шороогоо хамгаалан зогсч чадсан ялалтаа тунхаглаж байжээ.