Үйл явдал

БНХАУ-ын Сычуань мужийн баруун өмнөд хэсэгт байрлах панда хамгаалж, үржүүлэх Шэншүпин хэмээх томоохон төвд энэ жилийн анхны панда мэндэллээ. Өнгөрсөн Мягмар гарагт панда төрж, эх зулзагын бие сайн байгаа тухай CCTV-ээс мэдээллээ.

Шинээр мэндэлсэн панданы эхийг Шиншин гэж дууддаг. Мягмар гарагийн шөнийн 12 цагийн үед Шиншин 188.3 грамм зулзага гаргасан байна. Ингэснээр энэ төвийн долоон настай панда Шиншин хоёр дахь зулзагаа төрүүллээ. Өмнө нь Нидерланд Улсын хамгаалалд байхдаа анхны зулзагаа төрүүлж байжээ. Панда хамгаалж, үржүүлэх төвийн мэдээлж байгаагаар эх болон зулзагын бие хоёулаа сайн байна. Хятад Улс нь пандаг ихэд эрхэмлэн хайрлаж, үржүүлэх тал дээр анхааран ажилладаг учраас шинээр панда төрөх тохиолдлыг энэ улсын иргэд ихэд бэлэгшээдэг. Энэхүү панда үржүүлэг судалгааны төв нь 300 орчим пандатай дэлхий дээрх хамгийн том панда судалгаа үржүүлгийн төв хэмээн бүртгэгдсэн байдаг юм байна.