Үйл явдал

АНУ-ын төрийн департментаас Техас мужийн Хьюстонд байрлалтай консулын газраа хаах шаардлагыг Хятадын талд тавьсан байна. Ингэхдээ Баасан гараг гэхэд хаасан байх шаардлагатай гэдгийг анхааруулжээ. Хьюстон дахь консулын газрыг хаах шийдвэр гаргасны дараа консулын газарт гал гарсан байна.

Харин АНУ-ын албаныхан консулын газрыг бичиг баримт гэх мэт устгах шаардлагатай зүйлээ шатааж байгаа байх гэж таамаглажээ. Гал унтраагчид хэргийн газар очсон боловч дотогш оруулаагүй гэх мэдээлэл байна. Тиймээс маш олон гал унтраах багийнхан гадаа хүлээсэн байдалтай байгаа тухай хэвлэлүүд мэдээллээ.

АНУ-ын албаныханд энд бичиг баримт шатааж байсан гэх мэдэгдэл ирсэн бол Хятадын Гадаад хэргийн яамны төлөөлөгч Ван Вэнбин консулын үйл ажиллагаа хэвийн явагдаж байгаа гэж мэдэгдсэн байна.

Үүнээс гадна Вашингтон дахь Хятадын Элчин сайдын яаманд бөмбөг дэлбэлнэ гэсэн сүрдүүлэг ирсэн тухай тэрээр хэлжээ.  Хятадын Гадаад хэргийн яамны хэвлэлийн төлөөлөгч Хуа Чуняан АНУ-ын эрх баригчид шийдвэрээ цуцлахгүй бол хариу арга хэмжээ авна гэж хэлсэн. Харин баттай бус эх сурвалжийн мэдээлснээр Ухань хотод байрлах АНУ-ын консулыг хаах хариу арга хэмжээ авч магадгүй гэж таамаглажээ.

Хятад Улсын хувьд томоохон хотуудад АНУ-ын консулыг хаавал Америкийн эдийн засагт маш том хямрал үүсгэх юм. Ажиглагчдын зүгээс хоёр улсыг дипломат харилцаа тогтоосноос хойш энэ хэмжээний харилцаа нь муудаж хурцадмал байдалтай болж байгаагүй тухай мэдэгджээ.