Үйл явдал

Өмнөд Солонгос улсад шинэ халдварын тохиолдол сүүлийн нэг сарын турш анх удаа буурсан байна. Өнгөрсөн ням гарагт 100 халдварын шинэ тохиолдол бүртгэгдсэн нь сүүлийн нэг сарын хамгийн бага үзүүлэлт болж байгаа юм. Гэхдээ Засгийн газраас үндэсний баярын өдрүүдтэй холбоотойгоор хөл хориог үргэлжлүүлэн сунгана гэдгийг мэдэгджээ.

Халдварын тохиолдол багасах төлөвтэй байгаа ч ирэх нэг долоо хоногийн хугацаанд буюу 9-р сарын 27 хүртэл 2-р зэргийн хөл хориог сунгаж байна. Солонгос улсад сүүлийн үед хүн амын нягтаршил өндөртэй хотуудаас гадна хөдөө орон нутагт халдварын тохиолдол бүртгэгдэх нь их байгаа юм байна. Тиймээс Сөүл хотоос гадна бусад аймаг мужуудад ч хөл хорионы сунгалт хамаарч байгаа. 2-р зэргийн хөл хорионд хүмүүсийн дунд бөөгнөрөл үүсгэх үйл ажиллагаа явуулахгүй байх, баар караоке, музей, номын сан хаалттай байна. Ирэх 10-р сарын 3-нд Өмнөд Солонгос улсад ургацын баяр болно. Энэ жилийн хувьд баяртай холбоотойгоор төрөлх хот руугаа явах иргэдийн тоо өнгөрсөн жилийнхтэй харьцуулахад 30 хувиар буурах төлөвтэй байгааг албаныхан мэдээлсэн байна. Баярын өдрүүдээр тусгайлан илүү өндөржүүлсэн хөл хорио зарлаж, нийтийг хамарсан үйл ажиллагаа зохиогдож байгаа юу гэдэгт хатуу анхааран ажиллах тухай Өмнөд Солонгосын Засгийн газраас мэдэгджээ.