Үйл явдал

Бас нэгэн аймшигтай хэрэг өчигдөр шөнө Украйн улсын зүүн хэсэгт гарсан байна. Харьков мужийн Чухуйв хотын ойролцоо цэргийн онгоц осолдож, 25 хүн амь насаа алдлаа. Аймшигт хэрэг гарсан 9-р сарын 25-ны өдрийг мужийн эрх баричгид гашуудлын өдөр болгон зарлажээ.

Украины Зэвсэгт хүчний Агаарын цэргийн  “Ан-26” нисэх онгоц осолдсон байна. Нисэх онгоцны бүхээгт багийн гишүүдээс гадна Харьковын Агаарын хүчний их сургуулийн курсантууд байжээ. Онгоц газардаж байх үед осол гарсан байна. Украины Улсын онцгой байдлын албанаас мэдээлснээр, онгоцны бүхээгт 27 хүн байсны 25 нь амиа алдаж, хоёр хүн хүнд гэмтэл авсан байна. Осол сургуулийн нислэг хийх үеэр гарсан гэдгийг Украины Үндэсний аюулгүй байдал, батлан хамгаалахын зөвлөлийн нарийн бичгийн дарга Алексей Данилов мэдээллээ. Ослын шалтгаан нь онгоцны хөдөогүүрийн доголдол байсан гэдгийг Харьковын мужийн төрийн захиргааны дарга Алексей Кучерийн мэдэгдлээ. Украины Ерөнхийлөгч Владимир Зеленский өнөөдөр хэрэг гарсан газар очхоор болсон байна. Эмгэнэлт явдал болсонтой холбогдуулан ОХУ-ын Н.Е.Жуковский, Ю.А.Гагарины нэрэмжит Агаарын цэргийн академийн тэргүүн Геннадий Зибров Оросын нисэгчдийн өмнөөс Ан-26 онгоцны ослоор амиа алдсан хүмүүсийн ар гэрт эмгэнэл илэрхийлжээ. Түүнээс гадна Европын Холбооны Гадаад хэрэг, аюулгүй байдлын бодлого хариуцсан дээд төлөөлөгч Жозеп Боррель Укрианы эрх баригчдад эмгэнэл илэрхийлсэн байна.