Entertainment

Америкт тун удахгүй Хэллоуин буюу ариун сүнснүүдийн баяраа өргөн дэлгэр тэмдэглэх гэж байна. Хэдийгээр Хэллоуины баярыг жил бүрийн 10-р сарын 31-нд тэмдэглэдэг ч энэ жил Цагаан ордны тэргүүн хүүхэд багачуудыг эрт баярлуулахыг хүссэн бололтой. АНУ-ын ерөнхийлөгч Дональд Трамп, тэргүүн хатагтай Мелания нар Цагаан ордонд хүүхэд багачуудыг хүлээн авч, тэдэнд зориулан бэлдсэн баярын бэлгээ тараажээ. 

Энэ өдрүүдэд Америкт төдийгүй дэлхийн олон улс оронд Хэллоуин буюу сүнснүүдийн баярыг тэмдэглэж эхэлжээ. Хэдийгээр Хэллоуин нь бурхан болоочдын дурсгалыг хүндэтгэх шашны баяр хэдий ч энэ баяр Хэллоуин гэсэн нэрээр улс орны хүүхэд багачуудын хамгийн дуртай баярын нэг хэдийнэ болжээ. Энэ жилийн Хэллоуины баярыг Цагаан ордонд тэмдэглэж, Трамп Мелания нар бяцхан зочдоо хүлээн авч, тэдний хүсэн хүлээсэн баярын бэлэг сэлтийг тараасан байна. Ингэхдээ ерөнхийлөгч, тэргүүн хатагтай баярын тусгай хувцас хэрэглэл өмсч, ямар нэгэн дүрд хувираагүй байна.

Гэхдээ Цагаан ордны дэргэдэх шат болоод барилгын зарим хэсгийг Хэллоуины баярт зориулан тусгайлан чимэглэсэн байжээ. Цагаан ордны гол шатан дээр янз бүрийн хэлбэр хэмжээтэй том жижиг хулуу тавьж, улбар шар өнгөөр гэрэлтүүлэн, элдэв янзын дэнлүүнүүд байрлуулжээ. Түүнчлэн энэ үеэр Америкийн тэнгисийн цэргийн хүчний оркестр “Хий үзэгдлийн ангуучид” болоод “Харри Поттер” киноны дуунуудыг тоглож, уур амьсгалыг бүрдүүлсэн байна.

Цагаан ордонд Хэллоуины баярыг 1958 оноос эхлэн жил бүр тэмдэглэх болжээ. Тухайн үед Америкийн тэргүүн Дуайт Эйзенхаурын эхнэр Мейм Цагаан ордныг араг яс, хулуугаар чимэглэн, хүүхэд багачуудад бэлэг тарааж энэ уламжлалыг эхлүүлсэн байна.