Starlink сүлжээний 60 хиймэл дагуул хөөргөжээ

Америкийн Спэйс Икс компани Канавералын хошуун дахь сансрын нислэгийн төвөөс Фалкон-9 сансрын пуужин зөөгч хөлгөө амжилттай хөөргөлөө. Фалкон хөлгөөр Старлинк сүлжээний 60 бичил сансрын хиймэл дагуулыг дэлхийн тойрог замд гаргаж байгаа юм.

Америкийн Флорид муж дахь Канавералын хошуунаас орон нутгийн цагаар 23 цаг 44 минутад Фалкон-9 сансрын пуужин зөөгч хөлгийг хөөргөжээ. Фалкон хөлгөөр өмнө нь 6 удаагийн нислэг үйлдэж, Старлинк-ийн хиймэл дагуулуудыг сансрын  тойрог замд гаргасан юм. Старлинк хөтөлбөрийн хүрээнд дэлхийн тойрог замд нийтдээ 11 мянган бичил хиймэл дагуул хөөргөж, интернэтийн 5G системийн стандартад нийцсэн өндөр хурдны интернэтийн сүлжээ байгуулж байгаа юм.