Эдийн засаг

Манай улс 2015 оноос хойш иргэн аж ахуй нэгжүүдийн худалдан авалт, орлогын гүйлгээнд НӨАТ ногдуулан 10 хувийн шимтгэл авдаг болсон. Үүнээс иргэд 2 хувийн буцаан олголт авч сугалаанд оролцох баримттай үлддэг. Тэгвэл таван жилийн хугацаанд хэрэгжиж ирсэн НӨАТ манай улсын төсвийн 30 хувь буюу 2.7 их наяд төгрөгийг төвлөрүүлж байна.

Тэгвэл уг татварын хувь хэмжээг бууруулах, буцаан олголтын хувийг нэмэгдүүлэх хоёр төрлийн хуулийг байнгын хороо хэлэлцлээ. Тодруулбал, УИХ ын гишүүн Б.Пүрэвдорж НӨАТ-ын шимтгэлийг 5 хувь болгох хуулийн төсөл өргөн барьсан бол, УИХ-ын гишүүн Н.Оюундарь, Л.Оюун-Эрдэнэ нарын гишүүд буцаан олголтын 2 хувийг 7 хувь болгох төсөл өргөн барьсан юм.

Сангийн сайдын зүгээс НӨАТ нь хэрэглээгээр хэмжигддэг тул хувь хэмжээг бууруулснаар дунджаас дээгүүр орлоготой иргэд илүү хөнгөлөлт эдлэнэ гэдгийг онцоллоо. Тиймээс хувь хэмжээг бууруулж буцаан олголтыг нэмэгдүүлснээр татварын систем доголдож тэтгэвэр тэтгэмж тавьж чадахгүйд хүрнэ гэдгийг хэлсэн юм. Үүнээс гадна манай улс НӨАТ авдаг орнуудын хувь хэмжээнээс бага авдаг байна. Тухайлбал Европын орнууд 20.3 хувийн татвар авдаг бол, дэлхийн дундаж нь 1.,6 хувийн татвар ногдуулдаг гэлээ.

Төвийн байнгын хорооны хуралдаанаар дээрх хоёр хуулийн төслийг УИХ-аар хэлэлцэхийг дэмжсэнгүй. НӨАТ-ын шимтгэлийг 5 хувь болгон бууруулах, иргэдэд олгох буцаан олголтын 2 хувийг 7 хувь болгон нэмэгдүүлэх зэрэг хуулийн төслүүд нь өнөөгийн нөхцөлд эрсдэл өндөртэй гэж үзлээ. Харин сугалааны хувь хэмжээ, гадны жуулчид буцаан олголт авдаг байх асуудлыг тусгах боломжтойг сангийн сайд хэлсэн юм.