Эдийн засаг

Монгол Улсын хүн бүр 27 сая төгрөгийн өртэй гэж Улсын их хурал дахь Ардчилсан намын бүлгээс мэдээлсэн. Өрийн хэмжээ даацаас хэтэрсэн талаар ярьсан нь ташаа гэдгийг Сангийн сайд Ч.Хүрэлбаатар хэллээ. Хуулиар манай улс дотоодын нийт бүтээгдэхүүний 70 хувьтай тэнцэх хэмжээний зээл авч болно. Харин өнөөдрийн байдлаар 57 хувьтай байгааг онцоллоо. Гэхдээ энэ дүн иргэдийн шууд төлөх зээл гэж ойлгож болохгүйг тайлбарлалаа.

Монгол Улсын нийт гадаад өр 30.8 тэрбум ам.доллар. Үүнийг нэг иргэнд хуваан тооцвол иргэн бүр 27 сая төгрөгийн өртэй гэж сөрөг хүчин мэдэгдсэн. Тэгвэл Сангийн сайдын зүгээс Улсын нийт гадаад өрийг иргэд төлөх юм шиг тайлбарлаж болохгүй гэлээ. Нийт 30.8 тэрбум долларын 19.1 тэрбум ам доллар буюу 3-ны хоёр нь аж ахуй нэгж компаниудын өр юм байна. Үүнийг тухайн зээл авсан аж ахуй нэгжүүд л төлөх зохицуулалттайг онцоллоо.

Харин засгийн газар өнөөдрийн байдлаар 7.9 тэрбум ам долларын өртэй. Одоогоос дөрвөн жилийн өмнө Монгол Улсын засгийн газар өрөө төлж чадахгүй хэмжээнд хүрч улс даяар хандив цуглуулж байсан түүхтэй. Харин У.ХҮрэлсүхийн засгийн газар төлөх ёстой өнөөгийн өрийг эдийн засгийн ямар нэг эрсдэл дарамтгүйгээр төлж байгааг сангийн сайд хэлж байна.

Ч. ХҮРЭЛБААТАР: У.ХҮРЭЛСҮХИЙН ЗАСГИЙН ГАЗАР ТӨЛӨХ ЁСТОЙ ӨРИЙГ ЭДИЙН ЗАСАГТ ЭРСДЭЛ, ДАРАМТГҮЙГЭЭР ТӨЛЖ БАЙНА

 

УИХ-ын гишүүн Н.Алтанхуяг өрийн асуудлаар чуулган дээр хаалттай хэлэлцэх ёстой гэсэн. Харин Сангийн сайдын зүгээс засгийн газрын бүх ажил нээлттэй явж байгаа тул нууж хаах зүйлгүй ил ярилцах хэрэгтэй гэлээ.

Сөрөг хүчний хэлж байгаа шиг Монгол Улсын нэг иргэн 27 сая төгрөгийн өртэй гэдэг тооцоо өрөөсгөл гэдгийг ийнхүү хэлж байна. Өрийн асуудлаар засгийн газар УИХ дээр нээлттэй ил тод мэдээлэл өгөх бүрэн боломжтой гэлээ.