Эрүүл мэнд

Манай улсын хүн амын нас баралтын тэргүүлэх шалтгааны нэг нь хорт хавдар юм. Тиймээс хавдрыг эрт илрүүлэх оношилгооны төв байгуулах үүднээс УИХ-аар холбогдох хуулийн төсөлд өөрчлөлт орууллаа. Ингэснээр хавдрыг эрт илрүүлэх оношилгооны төвийг аймаг бүрт байгуулж долоон төрлийн эрт илрүүлэг оношилгоонд иргэдийг хамруулах юм.

Хорт хавдраар өвчлөгсдийн 70-80 хувь нь эмчлэгдэх боломжгүй хожуу үедээ оношлуулдаг байна.

Тиймээс 21 аймаг 9 дүүрэгт хорт хавдрын эрт илрүүлэг оношилгооны төв байгуулахаар төлөвлөн холбогдох хуульд өөрчлөлт оруулах асуудлыг УИХ-аар хэлэлцэн баталлаа.

Ингэснээр хүн амын нас баралтын тэргүүлэх шалтгааны нэг болсон хорт хавдрыг эрт илрүүлэх оношилгооны төв байгуулж 40-өөс дээш насны иргэдийг хамруулах зардлыг улсын төсвөөс гаргахаар болж байгаа юм.

Хавдрын чиглэлд төрөөс эрчимтэй анхаарч байгаагийн үндсэн дээр энэ жил Дорнод аймгийг оношилгооны компьютер томографаар хангасан байна. Одоогоор улсын хэмжээнд 11 томограф болон 19 ходоодны хавдрын оношилгооны тоног төхөөрөмж дутуу байгааг албаныхан хэллээ. Тиймээс ирэх оны төсөвт шаардлагатай тоног төхөөрөмжийн зардлыг тусгах нь хамгийн чухал байгааг гишүүд хэллээ.

Ийнхүү эрүүл мэндийн тухай хуульд нэмэлт өөрчлөлт оруулах хуулийг бүхэлд нь батлах саналыг хуралдаанд оролцсон гишүүдийн олонх дэмжин баталлаа.