Эрүүл мэнд

Манай улс коронавируст халдварыг дотооддоо алдаагүй дэлхийн цорын ганц улс болоод байна. Америк, Европын томоохон агентлагууд ч энэ мэдээллийг цацаж, Монголын туршлагаас бичжээ. Тэгвэл зөөвөрлөгдсөн тохиолдлыг эмчлэх, цаашид хүн амынхаа эрүүл мэндийг хамгаалах ажилд Дэлхийн эрүүл мэндийн байгууллага Монгол Улсад дэмжлэг үзүүлэхээр боллоо. Өнөөдөр хамгаалах хэрэгсэл, оношлуур, нэн шаардлагатай тоног төхөөрөмж хүлээлгэн өглөө.

КОВИД-19 халдвартай тэмцэх үйл ажиллагаанд зориулж НҮБ-ын суурин зохицуулагч ноён Мишра Тапан, ДЭМБ-ын суурин төлөөлөгч Др. Сергей Диордица нар ЭМЯ-нд шаардлагатай хамгаалах хэрэгсэл болон тоног төхөөрөмжийг гардуулж өглөө. Энэ үеэр Эрүүл мэндийн сайд Д.Сарангэрэл хэлэхдээ, коронавируст халдвар нь дэлхийн 7 сая 700 мянга гаруй хүнийг хамраад байгаа энэ үед манай улс халдварыг дотооддоо алдахгүй байх бүхий л арга хэмжээг тууштай, зохион байгуулалттай авч байгаа төдийгүй эрүүл мэндийн тусламж үйлчилгээний бэлэн байдлыг хангаж ажиллаж байна. ДЭМБ-аас бидний үйл ажиллагааг үргэлж дэмжин хамтарч ажиллаж байгаад талархаж байна хэмээсэн юм.

СЕРГЕЙ ДИОРДИЦА ДЭМБ-ЫН МОНГОЛ ДАХЬ СУУРИН ТӨЛӨӨЛӨГЧ

Орчуулга:   "Миний хувьд өнөөдөр ийм чухал арга хэмжээнд оролцож байгаадаа их баяртай байна. Өнөөдөр өгч байгаа энэ тоног төхөөрөмж, хамгаалах хэрэгсэл бол яг тэргүүн эгнээнд ажиллаж байгаа хүмүүст зориулагдаж байна. ХӨСҮТ болон тусгаарлах байруудад хүргэгдэнэ. Эрүүл мэндийн сайд Д.Сарангэрэл болон түүний багийнханд баяр хүргэе. Коронавирусний эсрэг маш оновчтой ажил, арга хэмжээ хэрэгжүүлж байгаад ДЭМБ-ын өмнөөс баяр хүргэж байна. Коронавируст халдвар дэлхий нийтэд тархсан цагаас эхлээд л Монгол Улс маш шуурхай арга хэмжээ авч хэрэгжүүлсэн. Эмийн бус сэргийлэх арга хэмжээг амжилттай хэрэгжүүлснээр дотооддоо халдвар алдаагүй, амжилттай хамгаалсаар байна. Цаашид энэ амжилтаа хадгалж үлдэнэ гэж найдаж байна."

МИШРА ТАПАН НҮБ-ЫН СУУРИН ЗОХИЦУУЛАГЧ

Орчуулга: "Эрүүл мэндийн салбарынханд баяр хүргэе! Сайн ажиллаж байгаа. Монгол Улсын хувьд энэ цаг үед дэлхийд жишээ болж байгаа улс орон. Нэг сараас хойш Монгол Улс гаднаас зөөвөрлөгдөж ирсэн тохиолдол 200-аас доош байна. НҮБ-ын хувьд ковид 19-ын үед 3 чиглэлээр ажиллаж байна.

1. Эрүүл мэндийн салбарын хариу арга хэмжээ

2. Хүмүүнлэгийн арга хэмжээ

3. Эдийн засаг, нийгмийн хариу арга хэмжээ гэсэн чиглэлээр ажиллаж байна. Монгол Улсын хувьд ДЭМБ-тай нягт уялдаатай ажиллаж байгаа нь сайхан байна. Д.Сарангэрэл сайд болон түүний багийнханд баяр хүргэе. Бахархаж байна."

Дэлхийн ихэнх оронд халдварын хурдацтай тархаж байгаа нөхцөл байдлын улмаас хамгаалах хэрэгсэл, тоног төхөөрөмжийн хэрэгцээ нэн шаардлагатай энэ үед ДЭМБ-аас амьсгалын аппарат, эмнэлгийн зориулалттай амны хаалт, лабораторийн оношлуур, амьсгалын аппарат, тоног төхөөрөмжийг хүлээж авлаа.

ФЭЙСБҮҮК ШУУД ҮЗЭХ