Засгийн газар

Монгол Улсын Ерөнхий сайд асан, Улсын их хурлын гишүүн Жаргалтулгын Эрдэнэбатыг Авлигатай тэмцэх газраас яллагдагчаар татаад байна. Түүнийг албан тушаалаа ашиглан бусдад давуу эрх олгосон байж болзошгүй гэж үзэж байгаа юм. Өнөөдөр Ерөнхий сайд асан Ж.Эрдэнэбатаас тайлбар авлаа. Тэрээр ямар ч хууль бус зүйл хийгээгүй гэдгээ хэллээ. 

 

Монгол Улсын Ерөнхий сайд асан Жаргалтулгын Эрдэнэбат нь үүрэгт ажлаа гүйцэтгэж байх хугацаандаа буюу 2017 оны 9-р сарын 13-ны өдөр засгийн газрын тогтоол гаргахдаа бусдад давуу байдал олгосон гэж АТГ үзсэн. Тодруулбал, Өмнөговь аймгийн Гурвантэс сумын нутагт орших Тост, тосон бумбын нурууны байгалийн нөөц газрын хилийн заагт, талбай нь давхацсан тусгай зөвшөөрөл эзэмшигчдэд нөхөн олговор олгох замаар тусгай зөвшөөрөл шинээр олгож талбайн солбицлыг баталсан байдаг байна. Тэгвэл шинээр тогтоосон тусгай зөвшөөрлөө өөрийн төрсөн дүү болох Эрдэнэтөгстэй хамтран эзэмшдэг Хэрх илч компанид шилжүүлсэн асуудлаар хуулийн байгууллага шалгаж байгаа. Энэ асуудлаар тэрээр тайлбар өглөө.

Тэрээр Ерөнхий сайдаар ажиллаж байхдаа Өмнөговь аймгийн Тост тосон бумбын нуруу, Булганы тэшиг, Сэлэнгэ аймгийн Ноён уул орчмын газар гэсэн гурван сумын нутаг дамжсан томоохон лиценз эзэмшигчдийн лицензийг хүчингүй болгож нөхөн олговор олгох замаар өөр газар зөвшөөрөл олгосон засгийн газрын тогтоол батлахдаа өөрийн хувь эзэмшдэг дүүгийнхээ компанийг дунд нь оруулсан гэж байгаа. Түүнийг хуулийн байгууллага яллагдагчаар татсанд тэрээр гишүүнээсээ татгалзан шалгуулах уу гэдэг асуултад тайлбар өглөө.

Үүнээс гадна уг асуудлыг хэвлэл мэдээллийн хэрэгслээр тарааж хуулийн байгууллагад хэрэг үүсгэж байгаа нь тодорхой зорилго бүхий хүмүүсийн үйлдэл гэлээ.