архив

Засгийн газар

Үндсэн хуулийн цэцийн их суудлын хуралдаанаар Ашигт малтмалын нөөц ашигласны төлбөртэй холбоотой хуулийн заалтыг хүчингүй болгосон нь 1.3 их наяд төгрөгийн татварын орлогыг авч чадахгүйд хүргэсэн гэж Сангийн сайд мэдэгдэж байгаа. Энэ асуудалтай холбоотой Засгийн газрын хоёр сайдын байр суурь зөрөлдсөн гэх мэдээлэл гарсныг Сангийн сайд үгүйсгэлээ. Үүнээс гадна Страто тэргүүтэй зарим нэг нүүрс угаах компаниуд дөрвөн хувийн татвар төлдөг тул АМНАТ-тай холбоотой зохицуулалт зайлшгүй байх шаардлагатай гэлээ.

Ирэх оны улсын төсвийн орлогын 9 хувь буюу 1.3 их наяд төгрөгийг Ашигт малтмалын нөөц ашигласны төлбөрөөс төвлөрүүлэхээр тусгасан. Гэвч Үндсэн хуулийн цэц аж ахуй нэгжүүдээс давхардуулсан татвар авах зохицуулалт гэж үзсэнээр хүчингүй болгоод байгаа юм. Цэцийн энэ шийдвэр гарснаар 1.3 их наяд төгрөгийн татварыг авч чадахгүйд хүрснээс гадна ашигт малтмалын нөөц ашигласны төлбөрийг хэн төлөх вэ гэдэг нь тодорхойгүй болсныг Сангийн сайд онцоллоо. Ингэснээр Страто тэргүүтэй зарим нэг нүүрс угаах компани бага татвар төлнө гэж байгаа юм.

АМНАТ таван хувиар авч эхлэснээр тус компаниас эхлээд олон газар өндөр татвар төлөх болоод байгаа тул компаниудын лоббигоор цэц шийдвэр гаргасан гэх хардлага үүссэн. Үүнээс гадна Страто гэх нүүрс угаах компани Ерөнхийлөгчийн тамгын газрын дарга З.Энхболдын дүүгийн компани гэдэг. Харин Ерөнхийлөгчийн тамгын газрын дарга АМНАТ дээр дараах байр суурийг илэрхийлж байсан юм.

Цэцийн гаргасан шийдвэртэй холбоотой Ашигт малтмалын нөөц ашигласны татварыг цаашид хэрхэх вэ гэдэг дээр Уул уурхайн сайд болоод Сангийн сайдын байр суурь зөрөлдсөн гэх мэдээлэл байгаа. Харин тийм зүйл огт байхгүйн дээр засгийн газрын байр суурь эрдэс баялгийн салбараас ашиг олж байгаа хэн бүхнээс татвараа авах нь зүйтэй гэх байр суурьтай байгааг хэлсэн юм.