Засгийн газар

Засгийн газрын хуралдаанаар БНХАУ-д туслах аяныг санаачлах шийдвэр гаргаж, ажлын хэсгийн ахлагчаар БОАЖ-ын сайд Н.Цэрэнбатыг томилсон. Тэрээр урд хөршид гарсан шинэ төрлийн халдвар тус улсын эдийн засаг, нийгэмд хүндрэл учруулж байгаа учраас БНХАУ-д туслах хүмүүнлэгийн аяныг өнөөдрөөс албан ёсоор нээж байгааг зарлалаа. Мөн тус улсад байгаа 400 орчим иргэнийг авчрах талаар арга хэмжээ авна гэж Гадаад харилцааны яамнаас мэдэгдэж байна. 

БНХАУ-д туслах хандивын аяныг иргэн, аж ахуйн нэгж байгууллага, бизнесийн төлөөллүүд зохион байгуулсаар байгаа. Их бага хэмжээгээр хувийн хамгаалах хэрэгсэл, мөнгөн тусламж өгсөөр байна. Үүнийг нэгдсэн зохион байгуулалтад оруулж Төрийн банкны нэг дансанд хандив цуглуулж БНХАУ-д өгөх шийдвэрийг Засгийн газрын хуралдаанаас гаргасан байна. Цугласан хандивыг долоо хоног бүр нийтэд мэдээллэж, БНХАУ-ын Элчин сайдын яаманд хүлээлгэх өгөх юм байна.

Монгол Улсаас жилд дунджаар 1.5 сая иргэн БНХАУ-д жуулчилдаг байна. Харин Монгол Улсад ирж буй жуулчдын 40 орчим хувийг БНХАУ-ын иргэд эзэлдэг байна. Манай улс 2018 оны байдлаар аялал жуулчлалын салбараас 596 сая орчим ам доллар буюу 1.5 их наяд гаруй төгрөгийн орлого төвлөрүүлжээ.