Нийгэм

Энэ жил махны экспорт хэсэг хугацаанд таслалдсан. Гэсэн ч ЗГ-ас арга хэмжээ авсны үр дүнд одоогоор адууны мах, дулааны аргаар боловсруулсан махыг экспортолж байгааг албаныхан хэлж байна. Гэсэн ч цар тахалтай холбоотойгоор зарим нэг хүндрэл байгааг тодотголоо. Мөн нөөцийн мах бэлтгэх ажил эхэлснийг ХХААХҮЯ-аас мэдээллээ. 

Цар тахал гарсантай холбоотойгоор махны экспорт энэ жилийн эхний хагас жилд хийгдээгүй. Тиймээс өнгөрсөн 5 сараас МУ-ын эдийн засгийн сайжруулах , идэвхижүүлэх чиглэлээр экспортыг хийх ажлыг төлөвлөн хэрэгжүүлсэн байна. Гэсэн ч цар тахалтай холбоотойгоор тээвэрлэлтийн хугацаа удаашралтай байгааг хэлж байна. 

Өнгөрсөн жил 58 мянган тонн мах экспорлосон байна. Энэ жилийн хувьд хэдий цар тахал гарсан ч өмнөх жилийнхээс экспортын хэмжээг бууруулахгүй байх тал дээр анхаарч ажиллаж байгаа гэлээ. Одоогийн байдлаар, Иран, Хятад, Вьетнам, ОХУ гэсэн улсууд руу голчлон экспорт хийж байгааг тодотголоо. Харин дотоодын нөөцийн мах бэлтгэлийн ажлыг эртнээс зохион байгуулан бэлдэж байгаа гэдгийг онцоллоо.

Манай улсын нийт хүн амын 2020 оны хүнсний хэрэгцээнд 116 мянга гаруй тонн мах шаардлагатай. Хүн амын бодит хэрэглээ, хүнсний зориулалтаар төхөөрөх малын тоонд үндэслэн тооцоход 354 мянга гаруй тонн мах дотоодын зах зээлд нийлүүлэх нөөцтэй гэж Хүнс, хөдөө аж ахуй, хөнгөн үйлдвэрийн яам үзсэн байна. 2019 онд 11 мянга гаруй тонн нөөцийн мах бэлтгэсэн байна. Харин энэ оны долоодугаар сарын байдлаар 10 мянга орчим тонныг нь худалдан борлуулсан гэх мэдээллийг ХХААХҮЯ-наас өглөө.