Нийгэм

Сүүлийн 10 гаруй жилийн хугацаанд эрүүл мэндийн салбарыг цахимжуулахад 100 гаруй сая доллар зарцуулжээ. Гэхдээ бүрэн төгс болсон гэж хэлэхэд учир дутагдалтай байгааг энэ салбарынхан хэлж байна. Иргэдэд ямар нэг чирэгдэл огт үүсдэггүй болгохын тулд цахимжуулах ажлыг эрчимжүүлэхээр төлөвлөжээ. Улсын их хурлаас ч ажлын хэсэг байгуулж энэ ажилд анхаарахаар болсон байна.

Манай улс одоогоос арав гаруй жилийн өмнөөс цахим үйлчилгээг нэвтрүүлэх ажлыг эрчимжүүлж төрийн бүхий л үйлчилгээг цахимжуулахаар ажиллаж байгаа. Өнгөрсөн хугацаанд Дэлхийн банк, Азийн хөгжлийн банк зэрэг олон улсын байгууллагын санжүүжилт, гадна дотны хөрөнгө оруулалт улсын төсвөөс гээд цахим шилжилт хийх ажилд 400 орчим сая доллар буюу өнөөгийн ханшаар 1 их наяд орчим төгрөгийг зарцуулсан байдаг байна. Гэвч төрийн үйлчилгээний хүндрэл чирэгдэл одоо ч байсаар иргэд аливаа үйлчилгээ авахдаа дугаарлан зогсож цаг зав уур бухимдалаа бардаг байдал өнөөдөр ч байгаа юм. Тэгвэл цахим шилжилтийн үр дүн, санхүүжилтын зарцуулалтыг шалгахаар УИХ-аас ажлын хэсгийг байгууллаа.
Цахимжуулах ажилд зарцуулсан дээрх хэмжээний мөнгөөс 100 орчим сая доллар нь эрүүл мэндийн салбарт зарцуулагджээ. Гэвч мөн л иргэд эрүүл мэндийн үйлчилгээ авахдаа урт оочир үүсгэж эмчийн өрөөний үүдийг сахидаг байдал үргэлжилсээр байгаа. Тиймээс ирэх 10-р сард багтаан улсын эмнэлгүүдийг бүрэн цахимжуулахаар төлөвлөжээ.

МАНАЙ УЛС АРАВ ГАРУЙ ЖИЛИЙН ХУГАЦААНД 400 ОРЧИМ САЯ ДОЛЛАРЫГ ЦАХИМ СИСТЕМ НЭВТРҮҮЛЭХЭД ЗАРЦУУЛЖЭЭ

Улсын эмнэлгүүдийг бүрэн цахимжуулснаар иргэд биеэр очилгүй үзлэг, шинжилгээний цагаа нарийн зохион байгуулалттай авч шинжилгээний хариу, эмчийн заавар зөвлөмжийг ч цахимаар авдаг болно. Томоохон улсын эмнэлгүүд цахимаар цагаа өгдөг ч олгосон цагийн хувиарын дагуу үзлэг явуулахгүй оочир дугаар үүсгэдэг асуудлыг зогсооно гэлээ. Мөн иргэний эрүүл мэндийн үзлэг эмчилгээний түүхийг цахим хэлбэрт шилжүүлэн аль ч эмнэлэгт очсон өмнөх бүх хугацааны үзлэг оношилгооны түүхийг нэг дороос харах боломжийг бүрдүүлэх юм байна.