Улс төр

Хонконгийн удирдагч Кэрри Лайм Бээжингийн Засгийн газраас гаргаж байгаа шинэ аюулгүй байдлын хуулийг зуун хувь дагаж мөрдөнө гэдгээ мэдэгдээд байсан. Үүнээс гадна иргэдийнхээ эрх, эрх чөлөөг ч бас хадгалсаар байх болно хэмээн онцолсон. Өнгөрөгч Бямба гарагт Бээжин хотод Бүх Хятадын Ардын Төлөөлөгчдийн их хурлын жил бүрийн чуулган хуралдаж эхэлсэн.

Энэ хурлаар бүх Хятадын хуульд өөрчлөлт оруулах болон шинэ хуулийн төслийг баталгаажуулдаг. Өнгөрсөн онд Хонконгт гарсан үймээн самууны улмаас энэ удаагийн хурлаар Хонконгийн үндэсний аюулгүй байдлын хуулийг хэлэлцэхээр болсон. 

Бээжингийн Засгийн газраас Хонконгийн шинэ хуулийн заалтуудад гадны бусад орны улс төрийн хамааралтай үйл ажиллагааг өөрсдийн нутаг дэвсгэр Хонконгт зохион байгуулахгүй байх, улс төрийн чанартай бослого урвалт, өдөөн турхирах үйл ажиллагааг явуулахгүй байх, төрийн нууцыг хадгалах, тусгай засаг захиргааны бүс Хонконгийг улс төрийн шинж чанартай шийдвэр гаргахыг хориглох, бусад орны улс төрийн бодлогыг даган дуурайх зэргийг хориглосон.

Харин Хонконгт залуус энэхүү шийдвэрийг эсэргүүцэж ахин үймээн самуун дэгдээж байна. 2019 оны сүүлээр Хонконгийн залуус эрх чөлөөнийхөө төлөө тэмцэж нилээн хүчтэй үймээн самуун өрнүүлж байсан ч, коронавируст цар тахлын улмаас нилээдгүй намжаад байсан юм. Харин 2020 оны хувьд энэ удаагийн бослого нь хамгийн анхны бослого боллоо. Өчигдөр гэхэд гудамжинд мянга мянган иргэн бослого гаргаж байгаа тухай BBC агентлагийн сэтгүүлч Анна Хонгконгоос шууд дамжуулсан байна. Цагдаа нар аргагүйн эрхэнд нулимс асгаруулагч газ буудаж нөхцөл байдлыг тайвшруулах гэж хичээсэн байна. Энэ үеэр 40 гаруй иргэн баригджээ.