Үйл явдал

АНУ-ын эрх баригчид Twitter компанийн хоёр ажилтныг Саудын Арабын ашиг сонирхолд нийцүүлэн тагнан турших үйл ажиллагаа явуулж байсанд буруутгажээ.  Тэднийг Саудын Арабын эрх баригчдыг шүүмжлэгч байр суурийг баримталдаг twitter аккаунт эзэмшигчдийн хувийн мэдээллийг хууль бусаар олж авч дамжуулж байсанд буруутгасан байна.  

Энэ хэргийн дагуу мөрдлөгө явуулсан ажлын хэсгийнхэн Саудын Арабын эрх баригчдыг өөрсдийнх нь ашиг сонирхлын эсрэг олон нийтийн цахим сүлжээнд идэвхтэй байдаг интернэт хэрэглэгчдийн мэдээллийг олж авах зорилгоор Twitter-ийн ажилтнуудыг өөрсдийн талд оруулсан болохыг тогтоожээ. Тэгвэл энэ хэргийн дагуу Америкийн хууль сахиулагчид АНУ-ын иргэд Ахмад Абуаммог баривчилж, бусдын эрх ашгийн төлөө ажиллаж, хуурамч бичиг баримт үйлдэн, Холбооны мөрдөх товчооны ажилд зориудаар саад тотгор учруулсан хэрэг тулгажээ.

Мөн түүнчлэн Саудын Арабын иргэн Али Алзабарахыг 2015 оноос эхлэн хууль бусаар twitter дахь 6 мянган хэрэглэгчийн аккаунт руу хууль бусаар нэвтэрсэнд буруутгажээ. Тэр дундаа тэрээр 2018 оны 10-р сард алагдсан Саудын Арабын сэтгүүлч Жамаль Хашоггийн twitter хуудсыг дагаж, хувийн мэдээлэл рүү нь нэвтэрч байжээ. Энэхүү хууль бус үйлдлийнхээ төлөө тэд Саудын Арабын эрх баригчдаас үнэтэй брэнд цаг, их хэмжээний мөнгийг нууц дансаараа дамжуулан авч байсан нь тогтоогдсон байна.