Үйл явдал

ДЭМБ-аас өгч байгаа мэдээллээр пүрэв гарагийн байдлаар дэлхийн улс орнуудад сүүлийн 24 цагийн хугацаанд 2,200 хүн COVID-19 коронавирусаар нэмж халдварласан байна. Ингэснээр дэлхий даяар нийт халдвар авсан хүний тоо 95 мянга давжээ.

Түүнчлэн COVID-19 анх дэгдсэн голомт болох Хятад улсаас гадна дэлхийн бусад улс орнуудад өнгөрсөн нэг хоногийн хугацаанд 200 хүн нас барсан талаар ДЭМБ мэдээлж байгаа юм.

COVID-19 коронавирусын халдвар урьдын адил Европ тивд Италид, Ойрхи Дорнодод Иран улсад, Азид Өмнөд Солонгос болон Хятадад төвлөрч байна. Итали улс энэ сарын 15-ныг хүртэл бүх сургууль цэцэрлэгээ хаах захирамж гарган, Франц улс онцгой байдлыг дэглэм тогтоожээ. Францад сүүлийн нэг хоногт коронавирусын халдварын 2 тохиолдол нэмж бүртгэгдсэний нэг нь сургуулийн бага ангийн сурагч болон түүний эцэг эхийн нэг нь халдвар авсан байна. Үүний улмаас Францын Валь Д’Уаз мужид байрлах сургуулийг нь хааж, хоёр долоо хоногийн карантинд авсан байна. Нийтдээ Франц орон даяар 150 гаруй сургуулийн хичээлийг хааж, карантин тогтоожээ.

Германд пүрэв гарагийн өглөөний байдлаар COVID-19-ийн нийтдээ 260 тохиолдол бүртгэгджээ. Германы Холбооны засгийн газар коронавирусын халдвар гарсан муж тойргуудад иргэдээ сонор сэрэмжтэй байж, онцын шаадлагагүй бол гадуур олон нийтийн газраар явахгүй байхыг зөвлөж байна. 

Израильд олон улсын хурал, семинар, арга хэмжээнүүдийг цуцалжээ. Түүнчлэн Франц, Герман, Швейцарь, Испани, Австри зэрэг орноос эх орондоо эргэн ирж байгаа иргэдээ 2 долоо хоногийн карантин, хөл хорионд авч байна.