Намууд

Харин Улсын их хурал дахь Шинэ эвсэл өнөөдөр гурван асуудал хэлэлцсэн байна. 11 намаас бүрдсэн Шинэ эвслээс Улсын их хурлын ээлжит сонгуульд нэр дэвших журмыг баталжээ. Мөнгөтэй биш мэдлэгтэй, сум орон нутагтаа манлайлагч, хүлээн зөвшөөрөгдсөн байх шаардлагыг тавьсан байна.

Улс төрийн 11 нам нэгдэн шинэ эвсэл байгуулсан ч цахим хуудсаар эвсэл тарсан гэх мэдээлэл сүүлийн үед цацагдах болсон. Харин энэ мэдээллийг ор үндэсгүй гэдгийг шинэ эвслийн дарга УИХ-ын гишүүн Ж.Батзандан онцоллоо. Учир нь УИХ-ын гишүүн Л.Болд Берлин-Москва-Улаанбаатар чиглэлийн онгоцоор нутагтаа ирж тусгаарлалтад орсон тул хуралд оролцох боломжгүй байгаа. Харин Бүгд найрамдах намын дарга Б.Жаргалсайхан хөдөө ажиллаж байгаа гэлээ. Тус эвсэл өнөөдөр хурлаа хийж урт цагааны түрээслэгчдийг хүлээн авч уулзжээ.

Шинэ эвслийн зүгээс ноолуурын үнийг харьцангуй тогтоож байгаа салбар яамыг шүүмжиллээ. Учир нь ноолуурын үнийг 100 мянган төгрөгөөс бууруулахгүй гэж салбарын сайд мэдэгдсэн. Гэвч Хөгжлийн банкнаас хөнгөлөлттэй олгох 300 тэрбум төгрөгийг өнгөрсөн оны ноолуур борлуулсан хэмжээ буюу 10 мянган тоннд хуваахад аймаг бүрт харилцан адилгүй үнэлгээ гарсан юм. Энэ нь шударга бус шийдвэр гэдгийг тус эвслийн зүгээс онцоллоо.

Шинэ эвсэл өнөөдрийн хурлаараа нэр дэвшүүлэх журмаа батласан байна. Тус эвслийн зүгээс гурван үндсэн зарчмыг барьж нэр дэвшигчдээ тодруулна гэлээ. Үүнд мөнгөтэй биш мэдлэгтэй хүнийг нэн тэргүүнд тавих, нийгмийн зүтгэл сайтай болон орон нутагтаа хүлээн зөвшөөрөгдсөн хүнийг дэвшүүлнэ хэмээн журамдаа тусгасан байна.