Архив...

Нийгэм

Гадны улс орноос ирсэн иргэдийг 14 хоног тусгаарлаж байгаа. Энэ хугацаа дууссаны дараа өрхийн эрүүл мэндийн төвийн хяналтан дор гэрт нь дахин 14 хоног тусгаарлах зөвлөмжийг хүргүүлээд байна. Мөн тусгаарлагдсан иргэдийн гар утсанд байршил тогтоогч суулгаж эхэлсэн. Хэрвээ утсаа унтраасан, орхиж явсан, зөвшөөрөлгүй гэрээсээ гарсан бол зөрчлийн хуулиар хариуцлага хүлээлгэнэ гэдгийг Нийслэлийн онцгой комиссоос санууллаа.

Шинэ коронавирусийн халдвараас сэргийлэх зорилгоор улсын хэмжээнд онцгой дэглэм тогтоон ажиллаж байгаа. Харин вирусийн халдвар тархсан орнуудаас Чартер нислэгээр ирсэн иргэдийг 9 амралт сувиллын газруудад тусгаарлан ажиглаж байгаа юм. Дээрх иргэдийг 14 хоног тусгаарлан гэрт нь гаргах журамтай. Цахим орчинд тусгаарлалтын хугацааг сунгах санал багагүй хөвөрч байгаа. Харин тусгаарлалтаас гарсан иргэдийг ӨЭМТ-ийн эмч нарын хяналтад байршил тогтоогч аппликэйшн гар утсанд нь суулган гаргахаар бэлтгэл ажлыг хангаж байна. Тухайн иргэний хаана явж байгааг эмч нар хянах бөгөөд олон хүн цуглуулах болон байршил тогтоогчоо орхин гарсан тохиолдолд зөрчлийн хуулиар шийтгэх арга хэмжээ авахаар төлөвлөжээ.

Байршил тогтоогчоо орхиж гарах, олон хүн цуглуулсан тохиолдолд зөрчлийн хуулиар хариуцлага хүлээлгэнэ

Үүнээс гадна өнгөрсөн амралтын өдрүүдэд онцгой дэглэм зөрчсөн 2000 гаруй зөрчил бүртгэгдсэн байна. Гэхдээ ноцтой зөрчил байхгүй гэдгийг албаны хүн онцоллоо. Нийслэл рүү орох, гарах найман авто тээврийн шалган нэвтрүүлэх товчоогоор ОХУ-аас хүнс тээвэрлэж байгаа иргэд шууд нэвтрэхийг оролдсон тохиолдлууд дийлэнх нь байжээ. Үүнээс гадна ОХУ-д онцгой нөхцөлтэй холбоотой сургалтын байгууллагуудын үйл ажиллагаагаа зогсоосон тул тэнд суралцаж байгаа оюутнууд хүндхэн нөхцөл байдалд орсныг Гадаад харилцааны сайд онцолж байсан. Манай улс Алтанбулаг Цагаан нуурын боомтуудыг энэ сарын 28 гэхэд бүрэн хаахаар төлөвлөсөн тул оюутнууд 27-ны өдрөөс өмнө орж ирэх хэрэгтэйг албаны хүн санууллаа.